မြန်အောင်မြို့သည် ဧရာဝတီမြစ်ဝကျွန်းပေါ်ဖြစ်ထွန်းရာ ဒေသ၏ မြောက်ဘက်အစွန်ဆုံးဒေသ ဖြစ်သည့်အားလျော်စွာ မြေမျက်နှာပြင်သည် အကြမ်းအားဖြင့် ညီညာပြန်ပြူးလျက်ရှိသည်။ သို့သော်အနောက်ဘက်၌ ပေ(၃၀၀၀ မှ ၅၀၀၀-ထိ)မြင့်မားသော ရခိုင်ရိုးမ (အနောက်ရိုးမ)တောင်တန်းကြီးများမှာ မြောက်ဘက်မှ တောင်ဘက်သို့ သွယ်တန်းလျက်ရှိပြီး စပါးပုံတောင် (၄၀၃၂)ပေမှာ ထင်ရှားသည်။
ဧရာဝတီမြစ်သည် မြို့၏အရှေ့ဘက်မှ အရှေ့တောင်ဘက်သို့ ကွေ့ကောက်စွာ စီးဆင်းနေသည်။ မြို့မြောက်ဘက်ရှိ ဖားတစ်ရှဉ်းချောင်း(ခေါ်)ပရှဉ်းချောင်းသည် ရခိုင်ရိုးမရှိ ကျောက်ပါးစပ်ဒေသမှ စတင်စီးဆင်းလာရာ ပန်းတောချောင်းနှင့် ပေါင်းစုံပြီး ဧရာဝတီမြစ်အတွင်းသို့ စီးဝင်သွားသည်။
မြို့တောင်ဘက်တွင် ကန်ဟောင်းချောင်းသည် ဧရာဝတီမြစ်အတွင်းသို့ စီးဝင်သည်။ မြန်အောင်မြို့၏တောင်ဘက်တွင် မမြချောင်းသည် ရခိုင်ရိုးမ တောင်ခြေမှ ရေနံတောင်ရွာ အရှေ့ဘက် မြေပြန့်လွင်ပြင်သို့ ချောင်းငယ်များ ပေါင်းဆုံ၍ ထူအိုင်အတွင်းသို့ စီးဝင်သည်။ ထူအိုင်ကြီးသည် မြန်မာနိုင်ငံအောက်ပိုင်း၌ ထင်ရှားသည်။ ဧရာဝတီမြစ်ကြီး(မှ မြန်အောင်မြို့အထက်သုံးမိုင်ခန့်ရှိ မာလာကာကုန်းရွာအနီးမှ စတင်ကာ တောင်ဘက်သို့ခွဲထွက်လာသော သဉ္ဖာလီမြစ်ဟောင်း အစ)နှင့် စပ်ဆက်နေသော်လည်း ယခုအခါ ရေထွက်ပေါက်မရှိ၍ အင်းအဖြစ်တည်ရှိသည်။
0 comments:
Post a Comment